Իրենց բնակարանների պաշտոնական նորամուտն էին տոնում 315 ընտանիքներ: ԵՊՀ շրջանավարտների միավորման կողմից իրականացված «Աջակցություն երիտասարդ համալսարանականների բնակարանաշինությանը» ծրագրի շրջանակում կառուցված բազմաբնակարան-բազմաֆունկցիոնալ շենքի պաշտոնական բացման հանդիսավոր արարողությանը ներկա էր նաեւ ՀՀ նախագահ Սերժ Սարգսյանը, Երեւանի քաղաքապետ Կարեն Կարապետյանը:
«Մենք այսօր ունենք մեր սեփական տունն ու անկախությունը: Իսկ սեփականություն ունենալն անկախության եւ ազատության խորհրդանիշն է: Բայց հիմա ոչ միայն մենք ենք անկախ այլ նաեւ մեր երեխաները, այսինքն` նրանք ունեն իրենց ազատության հանգրվանը, օթեւանն ու ապագային նայող ճանապարհը: Եվ հրաշալին այն է, որ այդ ճանապարհը մեզ համար հարթել է այն հաստատությունը, որտեղ մենք աշխատում ենք: Արդեն 20 տարուց ավելի ես համալսարանում եմ` սովորել եմ եւ երկար տարիներ աշխատում եմ, եւ երջանիկ եմ, որ կարողացա այս բնակարանը ձեռք բերել իմ համալսարանական աշխատանքով»,- ասաց ԵՊՀ հայ բանասիրության ֆակուլտետի հայոց լեզվի պատմության ամբիոնի դասախոս Նարինե Դիլբարյանը:
