Մատչելի բնակարան երիտասարդներին

Ծրագրի առաջին փուլի շրջանակում իրականացվում է շուրջ 300-ից ավելի Երեւանի պետական համալսարանի գիտամանկավարժական անձնակազմի համար նախատեսված բազմաբնակարան շենքի շինարարություն, որը շահագործման կհանձնվի այս տարվա օգոստոս-սեպտեմբեր ամիսներին: Հաշվի առնելով, որ երիտասարդ գիտամանկավարժական համակազմի բնակարանային խնդիրը արդիական է ոչ միայն ԵՊՀ-ի այլեւ ՀՀ մյուս բուհերի երիտասարդ մասնագետների համար, «ԵՊՀ շրջանավարտների միավորման» հոգաբարձուների խորհուրդը որոշում է ընդունել ծրագրի երկրորդ փուլի շրջանակում կառուցվող շենքում մատչելի բնակարան ձեռք բերելու հնարավորություն ընձեռել նաեւ այլ պետական բուհերի երիտասարդ գիտաշխատողներին: Այս տարի մեկնարկած շինարարությունը նախատեսվում է ավարտել 2012 թվականի հոկտեմբերին: Համալիրն ունենալու է երկսենյականոց եւ երեքսենյականոց շուրջ 90 բնակարաններ` 180 հազար դրամ արժողությամ:

Այսօր բազմաբնակարան շենքի հիմնարկեքի պաշտոնական արարողությունն էր: Ներկաներին ողջունեց «ԵՊՀ շրջանավարտների միավորում» ՀԿ նախագահ, ՀՀ սպորտի եւ երիտասարդության հարցերի փոխնախարար Արսեն Քարամյանը: «Մեր ծրագիրն այսօր թեւակոխում է նոր շրջափուլ: Մենք հիմնադրում ենք մի նոր բազմաբնակարան համալիր, որի ապագա բնակիչներն են դառնալու ՀՀ մեկ տասնյակ բուհերի երիտասարդ դասախոսներն ու գիտնականները: Վստահ եմ, որ այս պահին արդեն իսկ ուրվագծվել է եւ հստակ իրականանալի է դարձել մեզանից շատերի նվիրական երազանքը, այն է` ունենալ սեփական բնակարարն եւ ապրել ու արարել հանուն մեր պետության, հայ ժողովրդի բարօրության եւ կայուն զարգացման»,- ասաց Արսեն Քարամյանը:

Երեւանի պետական համալսարանի դոցենտ Կարինե Միքայելյանը նշում է, որ ծրագիրը թերեւս ամենամեծ օգնություններից մեկն է երիտասարդ ընտանիքների համար, որովհետեւ բնակարանային խնդիրն այսօր երիտասարդների համար ամենադժվարլուծելի խնդիրներից մեկն է: «Շուկայական գներով բնակարան գնել, այն էլ միանգամյա վճարումով, այսօրվա գիտաշխատողի համար անասելի դժվար է: Այս ծրագիրը խնդիրը լուծելու այլընտրանքային` առավել հեշտ ու մատչելի ճանապարհ է առաջարկում»: Նախաձեռնության շահառու երիտասարդները նշում են` ծրագիրը ոչ միայն սոցիալական այլեւ բարոյական մեծ օգնություն է:

«Գիտական գործունեությունը շարունակելու լավ խթան է, հոգեբանական աջակցություն, որը, թերեւս, կօգնի հաղթահարել այն ֆինանսական խոչընդոտները, որ սպասվում է բոլոր շահառուներիս, որովհետեւ այսօր ոչ մի դասախոս միայն իր աշխատավարձով նման գնումներ իրեն թույլ տալ չի կարող»,- ասում է Խ. Աբովյանի անվան պետական մանակավարժական համալսարանի գիտաշխատող Վահե Մարտիրոսյանը:

«Երիտասարդ գիտաշխատողի աշխատավարձով նման բնակարան գնելը միանշանակ չի կարելի,- ասում է Երեւանի պետական բժշկական համալսարանի գիտաշխատող Արմեն Մխիթարյանը, բայց եւ հավելում,- սակայն սա աննախադեպ ու բացառիկ հնարավորություն է, այն երիտասարդների համար, ովքեր իրենց էությամբ գիտնական են եւ չեն կարող այլ կերպ գումար վաստակել: Այս դեպքում օգնում են ծնողները, ընկերները, հարազատ մարդիկ, վերջիվերջո` վարկային կազմակերպություններն ու բանկերը»: Գիտաշխատողի երիտասարդ ընտանիքը լավատես է` Արմեն Մխիթարյանը վստահ է, որ նման ծրագրի նախաձեռնողները ամեն ինչ կանեն ավելի մեղմացնելու շահառուների հետագա ֆինանսական պարտավորությունների իրականացման գործընթացը:

Ողջույնի ելույթներից հետո Արսեն Քարամյանը ընթերցեց սերունդներին ուղղված ուղերձը, որն այնուհետ շահառուներից Երեւանի պետական բժշկական համալսարանի դոցենտ Աննա Սեմերջյանը ընտանիքի անդամների օգնությամբ տեղադրեց բնակելի համալիրի հիմքում: Հիմնարկեքի պաշտոնական արարողությունից հետո նորակառույցի շահառուները հնարավորություն ունեցան շրջելու ծրագրի առաջին փուլի շրջանակում կառուցվող բազմահարկի շինհրապարակում:

«Զբոսանքի» ընթացքում ներկաները ուրախ էին, բայց եւ մտազբաղ: Երիտասարդ շահառուները մտովի համեմատում էին շենքերը, փորձում պատկերացնել իրենց ապագա բնակարանի դիրքն ու վերջնական տեսքը, մտածում անհրաժեշտ գումարայաին ծախսերի մասին: Փոխարենը միանշանակ ոգեւորված էին երեխաները, իսկ ամենափոքրիկները հասցրել էին քուն մտնել: 7 ամսական Անին մտածելու «ժամանակ չունի»: Նրա փոխարեն այսօր ուրախանում եւ ապագայի մասին կանխատեսումներ էին անում նրա երիտասարդ ծնողները: Անիի հայրիկը` Խ. Աբովյանի անվան պետական մանակավարժական համալսարանի գիտաշխատող Տիգրան Գրիգորյանը ապագա հարեւանների հետ դեռ չի հասցրել ծանոթանալ, բայց արդեն իսկ վստահ է, որ թե երիտասարդ բնակիչների եւ թե նրանց երեխաների համար կարեւոր է, երբ հարեւանները ունեն նույն հետաքրքրություններն ու արժեքային համակարգը:

Արսեն Քարամյանը տեղեկացրեց, որ երիտասարդական նմանօրինակ ծրագրերի նախաձեռնությունն ու աջակցությունը պետության կողմից կշարունակվի: Առաջիկայում կմեկնարկի նոր ծրագիր, որը ուղղված է մարզերում բնակվող երիտասարդների բնակարային խնդիրների լուծմանը: Ծրագիրը կմեկնարկի Սյունիքի եւ Տավուշի մարզերից: Շուտով նախաձեռնությունը իր տրամաբանական շարունակությունը կունենա. պետական աջակցությամբ նմանօրինակ ծրագիր կիրականացվի նաեւ ՀՀ գիտությունների ազգային ակադեմիայում: