Կտրամադրվեն հիպոթեքային վարկեր

«Հիփոթեքային շուկան դիտարկելիս` անպայման կնկատենք ծրագրի էական մատչելիությունը. 10-20 տարի մարման ժամկետ, 20 տոկոս կանխավճար եւ 10 տոկոս տարեկան տոկոսադրույք»,-ասաց Ա. Քարամյանը` ավելացնելով, որ նորակառույց համալիրը կառուցվելու է Գիտությունների ազգային ակադեմիայի Մնջոյանի անվան նուրբ օրգանական քիմիայի ինստիտուտի հարեւանությամբ:

Մ. Գրիգորյանի խոսքով` բանկը պատրաստակամ է մասնակցելու նմանատիպ ծրագրերին, որոնք ուղված են ինչպես ստեղծագործական միությունների ներկայացուցիչների, այնպես էլ երկրի ողջ բնակչության սոցիալ-կենցաղային պայմանների բարելավմանը: «ՎՏԲ-Հայաստան Բանկ»-ը ծրագրի շահառուներին իր կողմից սահմանված պայմաններով առաջարկելու է կուտակային ավանդների ծառայություններ, եւ շահառուի վարկունակության գնահատման ժամանակ հաշվի կառնվի նաեւ վերջինիս կողմից ավանդային հաշվին կատարված վճարումների պատմությունը:

Նշենք, որ «ԵՊՀ շրջանավարտների միավորում» հասարակական կազմակերպությունն իրականացնում է «Մատչելի բնակարան` երիտասարդ գիտնականներին եւ ստեղծագործական միությունների անդամներին» բնակարանային ապահովության սոցիալական ծրագիրը, որն ուղղված է Հայաստանի երիտասարդ գիտնականների եւ ստեղծագործողների բնակարանային կարիքների բավարարմանը: Ծրագրի շրջանակում նախատեսվում է Երեւանի Պարույր Սեւակի 8 հասցեում կառուցել բազմաբնակարան-բազմաֆունկցիոնալ շենքային համալիր, որի բնակարանները շուկայականից անհամեմատ ցածր գներով կտրամադրվեն ՀՀ գիտությունների ազգային ակադեմիայի երիտասարդ գիտնականներին եւ Հայաստանի երիտասարդ ստեղծագործողներին:

Բնակարանային ապահովության սոցիալական ծրագրի շրջանակում կառուցվող բազմաբնակարան-բազմաֆունկցիոնալ շենքը լինելու է մոնոլիտ-երկաթբետոնյա, բազալտի եւ ֆելզիտի արտաքին երեսպատմամբ: Այն ունենալու է 6 շքամուտք, 14 բնակելի հարկ, մեկ, երկու, երեք եւ չորսսենյականոց 216 բնակարաններ, ստորգետնյա ավտոկայանատեղեր` նախատեսված մոտ 130 ավտոմեքենաների համար: Բնակարանները շահառուներին հանձնվելու են ամբողջովին վերանորոգված` պիտանի միանգամից բնակեցման համար: Շենքի հարակից տարածքն ամբողջությամբ բարեկարգվելու է, կառուցվելու են մանկական խաղահրապարակներ եւ կանաչապատ հանգստի գոտիներ, իսկ շենքի առաջին հարկն օգտագործվելու է հասարակական սպասարկման նպատակով: Տարածքն ունենալու է արտաքին լուսավորություն: Կապալառու կազմակերպության կողմից բնակարանների 1քմ-ի արժեքը սահմանվել է 184 հազար ՀՀ դրամ: Ծրագրի իրականացման արդյունքում առաջիկա երկու տարվա ընթացքում ստեղծվելու է ավելի քան 500 աշխատատեղ: Բնակելի համալիրի շինարարությունը մեկնարկելու է 2011 թ-ի ապրիլի 30-ին եւ նախատեսվում է ավարտել մինչեւ 2013 թ-ի փետրվարի 28-ը: