Հարգելի՛ շահառուներ,
Ընդառաջելով մեր ծրագրի բազմաթիվ շահառուների խնդրանքներին և հաշվի առնելով «Ավան 3» և «Ավան 4» ծրագրերում նշված խնդրի լուծման շուրջ ձևավորված փորձառությունը, ԵՊՀ շրջանավարտների միավորումը որոշում է կայացրել «Մատչելի բնակարան երիտասարդ գիտնականներին և ստեղծագործական միությունների անդամներին» ծրագրի շահառուներին նույնպես հնարավորություն ընձեռնել Պարույր Սևակի 8 և 8/1 հասցեներում կառուցվող շենքերում բնակարանները ստանալու առանց ներքին հարդարանքի:
Այն շահառուները, ովքեր ցանկություն ունեն իրենց բնակարանը ստանալու առանց ներքին հարդարանքի, պետք է մինչև 2014թ. սեպտեմբերի 15-ն այցելեն «Էյ Դի Էյ» շինարարական կազմակերպության գրասենյակ (հասցեն՝ ք. Երևան, Ծարավ Աղբյուրի 55/5 (համալսարանականների շենքի 1-ին հարկում)) և իրենց կողմից նախօրոք լրացված՝ բնակարանի ներքին հարդարման ձևաթղթում կատարեն համապատասխան նշում՝ ներքին հարդարումից հրաժարվելու վերաբերյալ: Ներքին հարդարումից հրաժարվելն իր մեջ ներառում է բնակարանում հետևյալ աշխատանքների չկատարումը՝ ներբնակարանային դռները չեն տեղադրվում, մանրահատակի կամ լամինատե հատակի բացակայություն, սալիկապատում չի կատարվում և պատերը կոսմետիկ հարդարված (ներկված) չեն):
Շինարարական կազմակերպությունը պատրաստակամություն է հայտնել ներքին հարդարանքից հրաժարված շահառուի բնակարանի 1 քմ.-ի արժեքը նվազեցնել 22800 (քսաներկու հազար ութ հարյուր) ՀՀ դրամով, որը կնվազեցվի շահառուի կողմից բնակարանի արժեքի վերջնական փուլի վճարման ժամանակ: Բնակարանի արժեքն ամբողջությամբ վճարած շահառուների դեպքում՝ սահմանված չափի գումարը հետ կվերադարձվի բնակարանի հանձնման-ընդունման ժամանակ:
Հաշվի առնելով այն, որ ներկայումս լայն թափով ընթանում են բնակարանների ներքին հարդարման աշխատանքները, խնդրում ենք խստորեն պահպանել սահմանված ժամանակացույցը: 2014թ. սեպտեմբերի 15-ից հետո բնակարանների ներքին հարդարումն իրականացվելու է համաձայն շահառուի կողմից նախօրոք լրացված ներքին հարդարման ձևաթերթիկի և բնակարանն առանց հարդարման հանձնելու հնարավորությունն այլևս չի գործելու:
Միաժամանակ, այն շահառուները, ովքեր ընտրել են մեկ սենյականոց բնակարան և նախագծի բարելավման արդյունքում՝ խոհանոցի համար նախատեսված սենյակը վերափոխվել է ննջարանի, մինչև 2014թ. սեպտեմբերի 15-ը նույնպես պետք է այցելեն «Էյ Դի Էյ» շինարարական կազմակերպության գրասենյակ (հասցեն՝ ք. Երևան, Ծարավ Աղբյուրի 55/5 (համալսարանականների շենքի 1-ին հարկում)) և կատարեն տվյալ սենյակին (ննջարանին) համապատասխան ներքին հարդարման նյութերի ընտրություն: